Երք. Հկտ 15th, 2019

Սերժ Սարգսյանն Արցախում հանդիպել է իր թայֆային, այդ թվում Վիտալի Բալասանյանին. Բադասյան

1 min read

Վիտալի Բալասանյանի կողմից Livenews.am-ի միջոցով հնչեցված հայտարարությունները ցնորք են եւ ռեւանշիզմի փորձ: Անդրադառնալով Նիկոլ Փաշինյանի կառավարության կողմից Հայաստանն ու Արցախը կործանման տանելու մասին Բալասանյանի հայտարարություններին՝ մեզ հետ զրույցում այսօր նման հայտարարություն արեց Արցախի ռազմական-քաղաքական գործիչ Վահան Բադասյանը:

Նրա համոզմամբ այդ հայտարարությունները պատահական չեն՝ հաշվի առնելով, որ այս օրերին Սերժ Սարգսյանը Արցախում է եւ հանդիպել է իր թիմակիցներին, այդ թվում՝ Բալասանյանին:

«Սերժ Սարգսյանը գտնվում է Արցախում, եւ հավաքել է իր թիմակիցներին, ավելի շուտ ոչ թե թիմակիցներին, այլ մաֆիային. դա թայֆա է, երկրակործան թայֆա: Վիտալի Բալասանյանը երկար ժամանակով նրանցից անջատվել էր, եւ ինքը մեծ ջանքեր գործադրելով միացավ 2016 թվականի այդ թայֆային, եւ սկսեց սպասարկել նրանց: Ցավալի է, բայց փաստ է: Այդ բոլոր մարդիկ այդ թայֆայի բոլոր անդամները թող նայեն իրենց կենսագրությանը, թող նայեն իրենց գործունեությանը եւ տեսնեն՝ ով է մինչեւ հիմա կործանել Հայաստանը»,- մեր զրույցում ասաց Բադասյանը:

Հարցին՝ այսինքն Սերժ Սարգսյանի հետ հանդիպումից ոգեշնչվա՞ծ է Բալասանյանը նման հայտարարություններ արել, Բադասյանը պատասխանեց. «Իհարկե, ոգի ստանալով՝ արդեն արել է այդ հայտարարությունները»:

Արցախի ԱԺ նախկին պատգամավորը կարծում է, որ Սերժ Սարգսյանի թիմը փորձում է ճշտել իր անելիքները, մարտավարությունը 2020 թվականին Արցախում սպասվող նախագահական եւ խորհրդարանական ընտրություններում, հասկանալ, թե ում են առաջադրելու, ում են ընտրելու:

«Հայաստանի իշխանություններին մնում է ճիշտ գործել եւ ճշմարիտ որոշում կայացնել: Օրինակ օգոստոսի 5-ի Նիկոլ Փաշինյանի արած արտահայտությունը շատ տեղին էր եւ շատ լավ ընդունվեց արցախցիների կողմից, եւ ամեն մի քաղաքական ուժ իր տեղը գտավ: Նման հայտարարությունները ՀՀ իշխանությունները պետք է հաճախակի անեն: Բայց պետք է նշեմ, որ հավիտյանս փակված է հին իշխանությունների վերադարձի ճանապարհը»,- հավելեց Վահան Բադասյանը:

Անդրադառնալով Նիկոլ Փաշինյանին եւ «Սասնա ծռեր»-ին ուղղված ֆիզիկական ոչնչացման սպառնալիքին՝ Բադասյանը կոչ արեց հումորով վերաբերել դրան: «Ֆեյսբուք»-ում ժողովուրդը ո՞նց է հումորով վերաբերում, դուք էլ հումորով վերաբերվեք: Ես դա անհեթեթություն եմ համարում: Ես այդ խոսքը հասկացել եմ այսպես. որ եթե մեկ անգամ էլ իրենք իշխանություն վերցնեն եւ «Սասնա ծռեր»-ը նորից ՊՊԾ-ն գրավեն, իրենք էս անգամ սպանելու են: Դրա համար ասում եմ՝ երբեմն կարելի է նաեւ հումորով վերաբերել, որովհետեւ ինչպե՞ս կարող են նրանք նորից իշխանություն վերցնել, ինչպե՞ս կարող են «Սասնա ծռեր»-ը ՊՊԾ գրավել…: Իսկ եթե ինչ-որ մեկը սպառնում է՝  ոչ ոք թող իրեն չնույնացնի Արցախի ժողովրդի հետ»:

http://armtimes.com

 

Կիսվել

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով

Facebook
Instagram
Telegram